Lou 30 d'óutobre de 2013, à l'age de 86 an, defuntavo Sèrgi Aneodo, ome d'acioun, pouèto, escrivan, autour coumi e dramati, chantre de la Prouvènço d'Itàli. Lou fube de mounde vengu à Sant Piè dins la Coumboscuro mounte es esta ensepeli disien coume èro ama e estima. La majo part noun pousquèron intra dins la glèiso nimai au cementèri.

Arneodo es lou simbole de la preso de consciènci de sa prouvençalita pèr la gènt di valado     prouvençalo de l'autre man de l'aigo vers.

Istitutour dins sa valado natalo, à Sancto Lucio de Coumboscuro, perseguis sis estùdi e vai lèu deveni proufessour de licèu.

De la segoundo mita dóu siècle XIXen fin qu'is annado 1950, la prouvençalita di valado sus lou pendis padan dis Aup prouvençalo èro  couneigudo que de quàuqui saberu. Sis estajan      l'ignouravon, cresènt que sa lengo ancestralo èro piemounteso. A parti de 1953, souto la      butado dóu group de pouèto piemountès Ij Brandé (lou cafiò) de raport estré nasquèron entre la Prouvènço e lou Piemount. L'un di jouine sòci de Ij Brandé, Gustavo Buratti (Burat en piemountés) se meteguè d'aprendre la lengo prouvençalo pièi anè assabenta la gènt di valado que sa lengo ancestralo èro lou prouvençau. Vaqui coume nous raconto Arneodo soun rescontre emé Burat « «... sus sa pichouno   « Lambretta », traverso lou Piemount de cimo au founs e vèn me cerca en Coumboscuro, pèr m'esclargi que la lengo di valèio dóu miejour-Piemount es de prouvençau, procho justamen d'aquelo de la « Mirèio » mistralenco. E nautre que lou sabian pas !... Mai, d'aquéu moumen avèn coumpres que falié boulega, que falié qaucaren faire !... »

Lou 13 d'avoust de 1961, se mesclèron à Crissolo au sourgènt dóu Po, à sis aigo, d'aigo de la Sorgo, de la Durènço e de l'Ubaio. L'ourganisaire dóu rescontre èro Gustavo Burat. Avié sachu recampa d'ome de trìo di dous pendis dis Aup prouvençalo que n'en citaren Carlo Rostaing, Capoulié dóu Felibrige, li majourau Marcèu Bonnet, Francés Gag, Reinié Jouveau e Pau Pons emai un jouine ome  estrambourda, Sèrgi Arneodo. A-n-aquéu jour se foundè l'Escolo dóu Po emé coume presidènt Pinin Pacot e secretàri generau Tavo Burat.

L'Escolo dóu Po anavo renouvela chasco annado lou recampamen de Crissolo, lou darnié dimenche d'avoust, dins uno ciéuta e uno valado despariero.

A Parti d'aqui, Sèrgi Arneodo vai faire de la revisto Coumboscuro, lou perioudi de la minouranço prouvençalo d'Itàli e creara                                 l'assouciacioun Coumboscuro Cèntre Prouvençal aguènt pèr ativeta un group de danso, de cant tradiciounau acoumpagna de musician, uno chourmo de tiatre pèr assegura lou mantèn de la lengo prouvençalo dins li valado. A mena uno acioun pèr lucha contro l'eisode rurau que toucavo li mountagno. Outenguè qu'un ensignamen bilengo italian-prouvençau siegue douna à l'escolo primàri de Sancto-Lucio.

En 1970, au Rescontre de Perrero dins la Vau Germanasco, lou mouvemen óucitan jitavo la bourroulo dins l'Escolo dóu Po prouvoucant un aplantamen de soun ativeta.

Bono-di Sèrgi Arneodo, li rescontre Piemount-Prouvènço desenant se debanaran à Sancto-Lucio.

Pau Pons, qu'avié déjà ourganisa uno proumiero Traversado en 1962 pèr lou Rescontre de La Tour (Vau Pelis), emé Jan-Glaude Chastan, decidon à l'estage dóu Prouvençau à l'Escolo de Pertus, en 1971, de faire d'à pèd la traversado dis Aup prouvençalo, de Barcilouneto à Sancto Lucio pèr lou Rescontre Piemount-Prouvènço. Despièi chasco annado se debano aquesto Traversado prouvençalo.

Es à la Traversado de 1979, que, sus li Counsèu de Sèrgi Arneodo à Pau Pons, Jan-Glaude Chastan, Felipe Danon, Enri Feraud, fuguè creado l'Unioun Prouvençalo.

Pau Pons fisara à l'Unioun Prouvençalo, la Traversado Prouvençalo.

Sènso relàmbi, desenant menaren d'acioun coutrìo emé Arneodo e Coumboscuro Cèntre Prouvençal. Sara la Carto de Coumboscuro, acord trasfrountalié entre li valado prouvençalo di dous caire dis Aup, sara la declaracioun de Briançoun, afourtissènt que la lengo prouvençalo es uno lengo poulinoumico que si varieta se valon tant l'uno coume l'autro. Sara soun acuiènço de la Traversado Prouvençalo en nous rapelant chasqu'an « ... vous digue de causo, que me soun intrado pèr lis ieu, l'esperiènci vidanto : bèn quaranto annado d'espèro emai d'obro perdequé dos Prouvènço n'en faguèsson qu'uno dessubre la mountagno e la frountiero. »

Sara guierdouna en 1997 pèr soun recuei de pouèmo « Danço di sesoun » dóu prèmi setenàri di Jo Flourau dóu Felibrige, en 2004, pèr la qualita de soun obro literàri, dóu Grand Prèmi literàri de Prouvènço.

Sèrgi Arneodo nous a trasmes soun espèr que siegon sèmpre liga lis ome di dous cousta de l'aigo vers dis Aup prouvençalo. Pantaiavo d'uno soulo Prouvènço lis escarbalant dins uno Europo unido.

Nous a baia soun testamen dins soun pouèmo « signal », que fasèn nostre. Es escri dins la varieta de la Vau

Grana de nosto lengo prouvençalo :

Me pauso, moun enfant, sus la bruhèro

li légn boussù : quouro la calabruno,

me charjon de ma crous, vau dins la niero

nuech, sus lou fil peirous de la barrièro

perqué jamai souto souléi, ni luno

ié sibi plus adrech ni ubac sus terro.

Pauso-me, moun enfant, sus la brusquiero

li ligno (bos) nouselu : quouro au calabrun devènon ma crous, vau dins la negro nue,

sus lou fiéu peirous de la barriero (cresten)

pèr que jamai souto soulèu, ni luno

ié siegue plus adrè ni uba sus terro.

                                                                                                                                                                                                                                                                  Sergio Arneodo

               Disèn à Maria, soun espouso, à sis enfant e à si felen que, pèr adouci sa peno pèr la despartido de Sèrgi.

                                                                                                                                                         Perseguiren d'ana dins la draio que nous a moustra.